MISTERYO SA KAHAYAG: ANGAYAN BANG AMPOON DUGANG SA ATONG NAANDANG MISTERYO SA SANTOS NGA ROSARYO? (UNANG BAHIN)

Niadtong Oktubre 16, 2002, si kanhing Papa Juan Pablo II miproklama diha sa iyang Apostolic Letter nga gipanguluhan ug "Rosarium Virginis Mariae" sa 2002-2003 isip "Tuig sa Santos nga Rosaryo". Uban niining maong proklamasyon, iyang gidugangan ang naandang Misteryo sa Santos nga Rosaryo (Kalipay, Kasakit ug Himaya) nga mao ang "Misteryo sa Kahayag/Kasilak". Ang maong misteryo sa kahayag mao ang:

1. Si Hesus gibunyagan didto sa suba sa Jordan 
2. Ang pagpadayag ni Hesus sa Iyang kaugalingon didto sa kasal sa Cana.
3. Ang pagpadayag ni Hesus sa Gingharian sa Dios.
4. Ang pagkausab sa panagway ni Jesus didto sa bukid sa Tabor
5. Ang pagkatukod sa Santos nga Eyukaristiya sa Katapusang Panihapon.

Kining maong dugang nga lima ka misteryo, paga-pamalandungan matag Huwebes, Niining paagi naguba ang naandang paagi sa mga adlaw diin pagapamalandungan ang ubang Misteryo sa Santos nga Rosaryo :

Kaniadto (sa wala pa ang 2002)
Lunes ug Huwebes   -   Misteryo sa Kalipay
Martes ug Biyernes  -   Misteryo sa Kasakit
Miyerkules, Sabado ug Dominggo  - Misteryo sa Himaya

Sa pagkakaron ( sumala sa sugyot ni Papa Juan Pablo II )

Lunes ug Sabado     -     Misteryo sa Kalipay
Martes ug Biyernes -     Misteryo sa Kasakit (nagpabilin)
Miyerkules ug Dominggo  - Misteryo sa Himaya
Niining maong dugang nga mga Misteryo, nakahatag kini ug kalibog sa mga tao, ilabina niadtong naanad sa tradisyonal nga pagpangadye sa Santos nga Rosaryo. Nakapangutana ang uban:
- Nausab na ba ang pagpangadye sa Rosaryo?
- Unsaon na man pagpangadye niining Misteryo sa Kahayag/Kasilak?
- Maggamit ba ug bag-ong rosaryohan para niini?
- Ug daghan pa.

Busa, mangutana kita mga Katoliko nga nagpakabana sa atong dakong debosyon ngadto sa Mahal na Birhen:

• OBLIGADO BA ANG TANANG KATOLIKO MANGADYE UG MAMALANDONG NIINING MGA MISTERYO?
• ADUNA BA'Y KAUSABAN ANG SANTOS NGA ROSARY?
• NGANO NAA MA'Y MGA KATOLIKO NGA DILI NAGAGAMIT SA MISTERYO SA KASILAK/KAHAYAG?
• UNSA MAN ANG MGA SUGYOT NI PAPA JUAN PABLO II DIHA SA IYANG APSOTOLIC LETTER NGA NAKAPABUGTO SA NAANDANG PAGPANGADYE SA SANTOS NGA ROSARYO?

Atong padayunon kining atong pagtoon sa sunod: Deo Gratias!

ADUNA BAY POSIBILIDAD ANG MGA BABAE MAMAHIMONG DIAKONO SA SIMBAHAN?

Sa gipahigayon karon nga Extra-Ordinary Synod on the Family sa Vatican, usa ka Arsobispo nga naggikan sa Canada, si Arsobispo Paul-Andre Durocher, ang kasamtangang Presidente sa Canadian Conference of Catholic Bishops mihatag ug usa ka suggestion didto sa maong Synod.
Sa iyang speech sa ikaduhang adlaw sa maong synod, mihatag siya ug mga suggestions:

• Una, sa paghatag ug posibilidad sa mga babaye ug trabaho diha sa mga Diocesis.
• Ikaduha, sa pagtugot sa mga mag-asawa sa maghatag ug story diha sa matag homiliya sa matag Dominggo aron paghatag ug testimonya sa ilang kinabuhing minyo. 
• Ikatulo, ang posibilidad nga ma ordinahan ang mga babaye nga mahimong Diakono.

Komentaryo:

• Unsa kaha nga mga trabaho ang angay ikahatag ngadto sa mga kababayen-an diha sa Simbahan? May kalabutan siguro kini sa mga nagkalain-laing ministriya siha sa Simbahan.
• Ngano katagaan man ug higayon ang mga mag-asawa nga maghatag ug paambit diha sa mga homiliya o sermon sa matag Misa? Di pa ba igo nga ang pari magahatag ug pagtulun-an o katesismo sa matag Dominggo nga Misa? Kung panag-ingnan ang hisgutan, mas maayo siguro nga mag-asawa maningkamot magpuyo diha sa kabalaan sa ilang kaminyoon kaysa itagawtaw kini diha sa Misa. Ang lihok mao ang paistoryahon.
• Wala gayud gitugutan sa Simbahan nga ang babaye mamahimong diakono ug ni sa sinugdanan sa kasaysayan sa simbahan, wala pa gayuy mga babaye nga diakono. Mabasa nato diha sa Buhat sa mga Apostoles ( Buhat 6:1-6 ) nga ang mga unang apostoles namili ug lalaki nga adunay mga maayong dungog aron maoy moatiman sa mga balo diha sa adlaw-adlaw nila nga panginahanglan. Ug mipili ang mga Apostoles ug 7 ka mga lalaki ug isa ni ana si Esteban     ( Buhat 6:5 ). Kini nga panglantaw nga ang mga babaye angayan mag-alagad diha sa santuaryo nitumaw lamang sa panahon sa Konsilyo Baticano Dos (1962-1965).
  
  
  Ang 1917 Canon Law nagatug-an kanato diha sa Canon 968 section 1 nga kadto lamang mga binunyagan nga lalaki ang makadawat sa sacramento sa Ordination. Ug maski ang 1983 Code of Canon nagkanayon diha sa Canon 1024 nga ang mga lalaki lamang nga binunyagan ang makadawat sa sacramento sa ordinasyon.
  
  Atong i-ampo ang atong Simbahan nga mobalik unta kini sa iyang naandang mga pagtulun-an ilabina nga mahibalik unta ang Tradisyon sa Simbahan. Pangayoon nato ang panabang sa Mahal na Birhen, Inahan sa Simbahan nga malamdagan ang mga ka-obispohan ug mga kapari-an diha sa matang sa Pagtoo nga pinasubay sa Magisterium, Balaang Kasulatan, ug Tradisyon sa atong Inahan - ang Santa Iglesya Katolika, Apostolika, Romana.

MALIPAYONG PAG-ABOT

Salamat sa pagbisita niini nga "BLOG". Namugna kini aron paghatag ug kasayuran sa tanang Katoliko mahitungod kung unsa kining BATIKANO DOS o ang Ikaduhang Konsilyo Batikano nga namugna niadtong tuig 1962-1965. Aron usab paghatag ug kaamguhan mahitungod sa epekto sa Ikaduhang Konsilyo Batikano sa kinabuhi sa tanang magtotoong Katoliko sa tibuok kalibutan, sulod sa 50 ka tuig na ang milabay.
Nanghinaot kami sa inyong kabukas sa inyong huna-huna ug ang ka andam sa pag-atubang sa kamatuoran sa mga panghitabo karon sa atong Simbahan.

Deo Gratias!